Nagdugang nin P20 an daily take-home pay kan mga Minimum wage earners sa Bicol Region epektibo kasuudma, December 1, 2025.
Ini an sa paagi kan implementasyon kan second tranche na nangangahulugan na an daily minimum wage sa Rehiyon an nag-aabot na sa P435.
Sigun ki Imelda Gatinao, regional director kan Department of Labor and Employment (DOLE) asin chairperson kan Regional Tripartite Wages and Productivity Board (RTWPB V), an nasambitan ng salary adjustment an parte kan Wage Order No. RBV-22, na pig-aprubahan kan RTWPB V kan March 10, 2025.
Dugang pa ni Gatinao, an first tranche na nagkakantedad nin nasa P20 an nagin epektibo na kan nakalihis na April 5, 2025.
Mientrastanto, ikinaogma man kan nagkapirang mga obrero an paglangkaw sa sweldo huli ta makakatabang man ini sa dugang na budget para sa pamilya.
Alagad kadakol man an nagsasabi na kulang pa an piglangkaw sa sweldo kan mga obrero orog na ta dae kaini kayang tamparan an naglalangkaw na barakalon asin serbisyo sa nasyon.
Sa ngunyan, pigsierto na sana kan Department of Labor and Employment Bicol na padagos an saindang pagdangog sa mga agrangay kan mga obrero sa Rehiyon tanganing makatabang sa mga ini.
