Pinagiromdoman kan Department of Labor and Employment (DOLE) an mga employer na obligadong itao an 13th-month pay sa saindang mga empleyado nin dae malampas sa Disyembre 24.
Sigun ki DOLE Secretary Bienvenido Laguesma, mayong exemption sa pagtatao kan benepisyong ini huli ta pigkokonsiderar ining statutory right kan mga obrero asin importante para sa pagtustos kan pangangaipuhan kan saindang mga pamilya ngunyan na holiday season.
Sakop kan 13th-month pay an gabos kan rank-and-file employees sa private sector, anuman an saindang posisyon, employment status, o paagi kan pagpapasahod, basta nakapagtrabaho sinda nin dae mababa sa sarong bulan ngunyan na taon.
Kaibahan digde an piece-rate workers, empleyadong may fixed wage plus commissions, workers with multiple employers, dating nag-resign o nahali, asin mga nag-maternity leave na igwang salary differential.
An minimum na 13th-month pay an katampad kan one-twelfth (1/12) kan kabilogang basic salary na kinita kan sarong obrero sa laog kan taon.
Pinagiromdoman man kan DOLE an mga employer na magsumiter kan saindang compliance report sa DOLE Online Compliance Portal hasta Enero 15, 2026, na naglalaog nin impormasyon dapit sa kompaniya, numero kan empleyado, listahan kan benepisyaryo, asin kantidad kan naresebir na benepisyo.
