Planong ipa-deport kan Bureau of Immigration an sarong ‘Chinese national’ na pigsasabing ‘importer’ kan mag-agom na Curlee asin Sarah Discaya sa saindang pagsasadiring ‘luxury cars’.
Sigun mismo ki Bureau of Immigration Commissioner Joel Anthony Viado, pigheras sa saiya ni Land Transportation Office Assistant Sec. Markus Lacanilao an pakakaarestar ki Cao Cheng na soboot car importer kan mga Discaya.
Basado sa impormasyon, arestado an nasambitan ng Chinese national huli sa nagkapira kaining pagbalgar sa ley siring kan obstruction of apprehension and prosecution of criminal offender, illegal use of alias, false representation, asin willful misrepresentation of material information.
Naarestar si Cao sa siyudad kan Makati asin nakaditine man sa Special Operation Division kan Highway Patrol Group sa Camp Crame, Quezon City.
Apwera pa digde, sigun ki Immigration Comm. Viado, ipigheras man kan Land Transportation Office na an naarestar an naggagamit nin ibang pangaran komo Martin Zhao base sa rekords.
Kun kaya sigun sa kawanihan, an paggamit kaini nin salang identidad an nagpapahiling na an dayuhan an maikokonsiderar na ‘undesirable’ asin dae nararapat pang magtinir sa nasyon.
Huli digde, piglalaomang maibalyo si Cao sa Immigration Facility sa Taguig City makalihis an inquest proceeding asin medical examination.
Asin kun mahatulang guilty sa mga kaso, mahampang an naarestar na Chinese national sa ‘deportation’ asin ‘blacklisting’ sa Immigration.
