Pigtawan duon kan Malacañang na dapat matukdo asin mahiling man an haros 13,917 flood control projects na pigreport na nagibo kan administrasyon ni dating Presidente Rodrigo Duterte.
Sigun ki Palace Press Officer Usec. Claire Castro, importanteng siripon an mga proyektong ini huli ta ginagamit soboot kan kampo ni Vice President Sara Duterte an isyu kan pagbaha para guluhon an administraston kan presenteng gobierno asin pagtakpan an mga anomalya kan nakaaging administrasyon.
Kaipuhan soboot maaraman kun haen asin ano an nagin resulta kan ribu-ribong flood control projects, orog na padagos an mahewasang pagbaha sa ibong kan dakol na mga proyektong dapat sana nagpugol digde.
Dugang pa ni Castro, importanteng maipahiling an tunay na epekto kan mga proyekto tanganing matawan nin kasimbagan kun tano nagtitinir na problema an pagbaha sa nasyon.
