Sigun sa Education Secretary Sonny Angara, ginagamit kan Department of Education (DepEd) an artificial intelligence (AI) tangani pakarhayon an haloy nang problema sa pamamayo kan data, pag-appoint kan school heads, asin pagheheras nin resources, imbes na magdagdag nin bagong teknolohiya sa klasrums na makakadagdag sa trabaho kan mga paratukdo.
Sa paagi kan Education Center for Artificial Intelligence Research (ECAIR), nahiling an mas pakarahay na kalidad kan data sa laog kan sarong taon.
Saro sa mga proyekto kaini iyo an, Project DUNONG, an nakatabang sa mas marikas asin malinaw na pagpili kan mga school head, na nakatipid kan pigkakarkulong Php5 milyon ngunyan na 2025.
An Project SIGLA man an naglinig kan data manungod sa salud asin sukol kan mga estudyante, na nagpababa sa oras na ginugugol kan paratukdo sa manual na pag-encode gikan sa 3.75 oras kada taon sa 1.87 oras, para mas makatuon sinda sa pagtutukdo.
Mientrastanto, an Project TALINO an nagtatao nin real-time na impormasyon sa mga pangangaipuhan kan eskwelahan para sa mas marikas asin transparent na pagheheras nin resources.
Sigun ki Angara, an AI an ginagamit sa maingat asin responsableng paagi tangani mapamarhay an sistema kan edukasyon, asin dae tangani komplikahon an trabaho kan paratukdo. Plano kan DepEd na pahewason an mga matrayumpo na proyekto sa irarom kan proposed 2026 national budget
