Nangapudan si Mamamayang Liberal party-list Rep. Leila de Lima na an mga haralangkaw na opisyal kan nakalihis na administrasyon an dapat manimbag sa mga paggadan sa luwas kan normal na anti-drug operations, kasunod kan pagpapatibay kan Supreme Court sa hatol laban sa tulong pulis na naggadan ki 17-anyos na Kian delos Santos kan nakalihis na Agosto 2017 sa Caloocan City.
Binanggit ni De Lima na dawa mag lihis na an pirang taon, matinir an kulog asin pangungulila kan mga pamilya kan biktima hasta an tunay na may sala sa rinibong pagkagadan sa nasyon an mapanimbag.
Sigun ki De Lima, pwedeng maabot an paninimbagang ini kun maipapasa an mga propwestong nagkriar kan Truth Commission sa Extrajudicial Killings (EJKs) asin Anti-EJK Act.
Ini an soboot para sa katarungan asin pambansang paghilom, asin tangani masiguro na dae na mauutro an siring na karumal-dumal na krimen.
Mientrastanto sinaysay ni Manila Second District Rep. Rolando Valeriano, chairman kan House committee on public order and safety, na an pagpapatibay kan hatol kan Supreme Court an dapat magbunsod nin komprehensibong reporma sa Philippine National Police (PNP).
Kan nakalihis na Nobyembre 2018, napatunayang guilty of murder an tulong pulis kan Caloocan City RTC Branch 125: PO3 Arnel Oares, PO1 Jeremias Pereda, asin PO1 Jerwin Cruz, sa irarom kan Article 248 kan Revised Penal Code.
Marurumdumang, si Kian, sarong Grade 11 student, an primerong pigkonsiderar na parte kan ilegal na droga, alagad nagluwas na ini an bagong suspect sana asin bako an orihinal na target. Inangkin kan pulisya na nagsayuma ini sa aresto asin nanlaban, alagad ipinahiling kan CCTV footage na dinaganan kan pulis si Kian antes ini binadil.
Sinayumahan kan Supreme Court Second Division an apelar kan mga pulis, na sinabing may treachery sa paggadan asin pighurot na si Kian an mayong kakayahang depensaran an sadiri kan badilon.
Nagpapatunay na pigtuyong pigbugtak kan mga akusado si Kian sa posisyon tangani magadan ini nin mayong kalaban-laban.
