NAGA CITY- Pormal nang nanumpa an nasa 89 na empleyado kan City Hall komo permanenteng empleyado.
Sigun ki Ansel Maño, HR Acting Head kan Naga City Hall, padagos na ginigibuhan nin paagi kan lokal na gobierno kan siyudad nin Naga na dae magbawas an empleyado asin an gabos na remedyo na dapat ipautob an saindang pigsusunod.
Paliwanag pa kan opisyal, mas marhay man giraray na permanente na sa trabaho an sarong indibidwal para sa inaapod na security of tenure.
An Security of tenure, an derechos sa padagos na pagtatrabaho asin nagpoprotehir sa mga indibidwal.
Pigsisierto kaini na dae tolos mahahali sa saiyang posisyon an sarong obrero na dae maagi sa legal na proseso asin mapatototohan na ini an naggibo nin bakong marhay na gawi.
Mientrastanto, padagos man an pigsasagibong pag-imbentaryo sa mga empleyado kan City Hall tanganing maaraman an mga dapat na gibuhon sa mga ini.
Sa ngunyan, pigsierto na sana kan opisyal na yaon an saindang opisina asin an lokal na gobierno kan siyudad nin Naga na preparadong magtabang sa mga empleyado kan City Hall.
