Pigbuyagyag ni Department of the Interior and Local Government (DILG) Secretary Jonvic Remulla na pig-testing soboot kan sarong kontraktor asin sarong kongresista na saro man kontraktor o tinaguriang “cong-tractor” na suhulan ini asin saiyang tugang na si Ombudsman Jesus Crispin Remulla nin kabilogang kantidad na P2 billion sa tahaw kan imbestigasyon sa anomaliya sa flood control projects.
Sigun ki Sec. Remulla, pig-agi an tangkang pagsuhol sa sainda sa paagi kan emissaries kan kontraktor asin kan nakatukaw na Cong-tractor, an sarong grupo soboot sa Visayas-Mindanao group mantang an saro man Luzon group.
Kahagadan kan mga ini na tabangan sinda sa saindang kaso, matanggal sa listahan asin pagbigyan na maka-piyansa.
Pigpaliwanag man kan sekretaryo na dae tolos pig-arestar an mga ini sa ibong kan saindang pagtatangkang suhulan an mga opisyal huli ta madali sana nindang maikakaila an tangkang pagsuhol asin sabihon ‘hearsay’ o gibo-gibo sana ini huli ta dae man soboot direktang inialok an suhol.
Dae na man soboot nag-reach out an sekretaryo sa nasambitan na kongresista asin kontraktor makalihis an nasambitan na insidente huli ta dae man kaini personal na bistado an mga ini asin luwas na ini sa saiyang trabaho komo DILG Secretary.
Mientrastanto, kan maghapot man sa reaksiyon ni Ombudsman Remulla katakod sa alok na suhol, napangirit nasana an opisyal huli ta siring na sana kaidto kasadit an hiling sa sainda.
