Nagtutubod an whistleblower sa kaso kan mga nawawarang sabungero na si Julie “Dondon” Patidongan na posibleng mayo na sa Pilipinas an negosyanteng si Atong Ang, na may warrant of arrest katakod kan kasong kidnapping with homicide.
Sigun ki Patidongan, posibleng naghali na sa nasyon si Ang kan Disyembre pa.
Marurumduman kan Miyerkules, nagluwas an Regional Trial Court (RTC) Branch 26 sa Sta. Cruz, Laguna nin warrant of arrest kontra ki Ang asin 17 iba pa makalihis mahilingan nin probable cause sa kasong kidnapping with homicide, sarong krimeng dae pupwedeng piyansahan.
Nasa kustodiya na kan PNP-Criminal Investigation and Detection Group (CIDG) an 17 sa 18 akusado. Saro pang warrant of arrest an pigluwas kan Biyernes kan RTC sa Lipa, Batangas kontra ki Ang asin pira pa katakod kan parehong kaso.
Kan Huwebes, naghagad an PNP-CIDG nin Interpol red notice kontra ki Ang. Siringman, sinaysay kan Department of Justice (DOJ) na si Ang nagtitinir pa man sa Pilipinas “based on all available records.”
Sigun ki Patidongan, kun nasa nasyon pa si Ang, pupwedeng nagtatago ini sa saro sa saiyang mga pagsadiri.
May pigtangro na P10 milyong pabuya para sa impormasyong matukdo sa pagkakaarestar ki Ang. Sinaysay man kan Malacañang na mayo ng special treatment sa kaso kan negosyante.
