NAGA CITY- Pigsaysay kan pamayuhan kan DTI-Camarines Sur na mapakol sa P20-M an saindang target na sales para sa ikukundusir na Feria De Camarines ngunyan na taon.
Sa entrevista kan Bombo Radyo Naga ki Jay Percival Ablan, Provincial Director kan DTI-Camarines Sur, sinaysay kaini na sa Feria de Camarines featuring Delicioso igwa sindang target sales na P3-M, mantang sa Muebles mapakol sa P8M an target na kita asin 2M sa UMA Usbong.
Apwera digde, piglalaoman man na maaabot sa labi P40-M an magigin kita sa over all trade fair kun saen dae pa kabali digde an Orgulyo bikol na nakakapag-generate nin nasa P30-M.
Siringman, yaon pa an Bishop Gainza Trade Fair na halangkaw man an saindang kita.
Mientrastanto, saro man sa mga nagigin ulang sa pagkundusir kan nasambitan ng mga aktibidad iyo an mga kalamidad na dae kayang kontrolon kan siisay man.
Katakod kaini, pigsierto kan opisyal na an DTI, may bagyo man o mayo, pirmeng nagtatao nin asistensiya sa mga MSMEs siring na sana kan calamity loan.
Sa paagi soboot kaini, marekas na makakabuhat an mga sararadit na negosyante enkaso magtama man an makusog na kalamidad. Sa ngunyan, pigsierto kan opisyal na padagos an saindang pagbilog nin mga programa na makakatabang sa mga MSMEs na magin mauswag an saindang hanap-buhay.
