Padagos an search and rescue operations na isinagibo kan Philippine Coast Guard (PCG) para sa mga biktima kan trahedya kan paglubog kan motorbanca na MBCA Amejara asin kan barkong MV Devon Bay.
Dae nag-untok an mga personahes kan PCG sa paghahanap asin pagsalbar sa mga posibleng nakasalbar sa duwang insidente.
Sigun sa pahayag ni PCG spokesperson Captain Noemi Cayabyab, kumpirmadong limang lawas na an narekober gikan sa insidente kan MBCA Amejara.
An mga binawiang biktima an dinara na sa Davao City tanganing maisagibo an proseso kan identification asin matukoy an saindang pagkakakilanlan kan saindang mga kaparientes.
Sa kabilogang 16 na sakay kan nasambitan ng bangka, saro sana an nairehistrong nakasalbar, mantang sampulo pa an padagos na pighahanap kan mga otoridad.
Tanganing maparekas an paghahanap, isinasagibo an aerial survey sa lugar kan insidente.
Nakikipagtabangan man an PCG sa manlaen-laen na ahensiya kan gobyerno asin mga volunteer groups, kaibahan na an Philippine Navy, Office of Civil Defense (OCD), mga lokal na gobyerno (LGU), Philippine National Police (PNP), asin magin an mga volunteer fisherfolk na harani sa lugar.
Sigun sa mga report, nanutaran an mga lawas sa rayong 65 hasta 68 nautical miles harani sa Balut Island. Padagos an paghihingowa kan PCG na mahanap an mga nawawarang indibidwal sa orog na marekas na panahon.
