Nag-arangkada na sa Senado an primerong pagdangog sa prosopwestong Anti-Political Dynasty Bill na nagbabawal sa mga magkakaparientes na sarabay na magkandidato asin manungkulan sa gobyerno.
Sa pagbubukas kan pagdangog kan Senate Committee on Electoral Reforms, nangapodan si Senator Risa Hontiveros, Chairperson kan komite na tulos ipasar an prosopwestong Kontra Dinastiya Bill.
Tinukoy ni Hontiveros an maraot na epekto kan political dynasties, kaibahan an pagluya kan checks and balances asin accountability, paglala kan kapagtiosan, asin pagtindi kan political violence sa nasyon.
Pigpunto man ni Senator Kiko Pangilinan na igwang malinaw na clamor gikan sa publiko para sa pagsasaley kan prosopwesto.
Basado soboot sa Pulse Asia Survey kan nakalihis na Disyembre kan nakalihis na taon, labi kabanga kan mga Pilipino an nagtutubod na Anti-Political Dynasty Law an susi sa paglaban sa mahewasan asin sistematikong korapsiyon sa gobyerno.
Mientrastanto, sinaysay man ni Senator Erwin Tulfo na preparado ining magtalima asin igalang an prosopwestong ley maski pa parte man ini kan sarong political dynasty.
Siring man si Senator JV Ejercito na nag-amin na kaibahan asin nakinabang sa political dynasty, alagad suportado pa man an prosopwesto tanganing matawan nin tyansa an iba na magkandidato asin maglaban sa eleksiyon.
