NAGA CITY- Piglalaoman na saro pang bagyo an maeeksperyensiyahan sa mga masunod na bulan sa bilog na nasyon.
Sigun ki Ian Neil Nuñez, officer-In-Charge kan CBSUA-Pili Agromet Station, basado sa climate monitoring and prediction section kan weather agency, ngunyan na bulan kan Pebrero asin Marso igwang tig-sarong bagyo an posibleng mabilog.
Paliwanag kan opisyal nasa kasagsagan kan amihan asin pa-transition na an klima kun kaya siring kaini an magigin forecast.
Ini an posibleng magin prediction man sa mga masunod pang bulan na pinagpeprepararan kan ahensiya.
Mientrastanto, an namamatean man na malipot na panahon sa nasyon an dara kan pagtunaw nin mga yelo sa siberian continent.
An duros nagigin pababa an deriksyon na nagreresulta sa malipot na klima.
Huli kaini, padagos na pig-aabisuhan an publiko na maglikay sa epekto kan paiba-ibang temperatura na namamatean tanganing makalikay man sa helang na dara kaini.
Sa ngunyan, pigsierto na sana ni Nuñez na nakatutok sinda sa kamugtakan kan panahon tanganing tolos na makapagtao nin update sa publiko.
