Nagpahayag nin kapreparaduhan asin kamawotan na magtestigo an dati soboot bagman ni Vice President Sara Duterte na si Ramil Madriaga para sa magigin impeachment proceedings kontra sa Bise Presidente kun ini an pigsugo kan Senado asin magin kan Kamara.
Sa sarong entrevista, pigsaysay kan legal counsel ni Madriaga na si Atty. Raymund Palad na ini an nakadepende pa kun enkaso man na matawan nin subpoena tanganing mag-atender sa mga pag-urulay sa impeachment.
Pigsaysay pa ni Palad, huli sa nagin pagsusumiter ni Madriaga kan saiyang mga salaysay, pwede ining ipaapod sa kongreso asin magin sa Ombudsman.
Apwera digde, ikinakilhag soboot kan panig ni Madriaga na nagamit an mga affidavit kaini sa pagsusunad nin impeachment complaints kontra ki VP Sara.
Digde kaya nakapalaman an mga akusasyon ni Madriaga kontra sa Bise Presidente dapit sa paggamit soboot kan kwarta kaini gikan sa operasyon kan Philippine Offshore Gaming Operations (POGO) asin mga drug dealers para sa saiyang pangangampaniya kan nakalihis na eleksyon 2022.
Mientrastanto, pigkumpirmar man ni Palad na naghagad nin request sa saiya si dating senador Antonio Trillanes na bisitahon si Madriaga tanganing pag-ulayan an iba pang laog kan affidavit na iyo man an pigtugutan kan saindang panig.
Nakatalaan man na mag-apelar asin magsumiter kan saindang application an lado ni Madriaga para sa sarong Witness Protection Program (WPP) huli naman sa mga death threats na narereseber kaini.
