Pigsugo kan Department of Energy (DOE) sa Philippine National Oil Company (PNOC) na magbakal nin dai mababa sa 1-M na bariles nin diesel komo reserbang supply kan gobyerno, sa tahaw kan padagos na paglangkaw kan presyo kan lana asin paghadit sa global market.
Segun ki Director Rino Abad kan Oil Industry Management Bureau (OIMB-DOE), direktiba ini hale ki DOE Secretary Sharon Garin ngani na masierto na igwa nin magkakanigong supply nin diesel an nasyon enkaso magkaigwa nin biglaan na disruption sa global distribution.
Paliwanag ni Abad, gagamiton kan PNOC an sadiri nindang fondo sa pagbakal kan diesel reserve asin ipabakal sa mga oil companies na mayong ano man na markup, kun kaya dae piglalaoman na maglangkaw pa an market price.
Target kan gobyerno na magbakal nin mga supply hale sa mga nasyon arog kan South Korea, Japan, Singapore, Malaysia, Indonesia, asin Canada, na piglalaoman na makakadagdag sa supply security kan nasyon.
An lakdang na ini parte kan contingency plan kan gobyerno sa atubangan kan nag-oorog na tensyon sa Middle East, partikularmente an banta na isara an Strait of Hormuz, saro sa pinaka-importanteng ruta nin Oil sa kinaban.
Sa presente, an presyo kan gasolina naglangkaw sa laog nin walong magkasunod na semana asin sampulong semana para sa diesel asin kerosene, mantang an China binabawasan man an mga export nin pinong gatong, na orog pang nagpapalangkaw kan pangigipit sa merkado kan kinaban.
Pigsierto kan DOE na an pagbakal kan reserbang diesel bako para sa ganansya kundi para maprotehiran an ekonomiya asin namamanwaan laban sa epekto kan global energy turmoil.
Sa lakdang na ini, piglalaoman na mas magigin estable an suplay kan diesel sa nasyon, na importante para sa transportasyon, logistics, asin iba pang sektor na labi-labi an pagsarig sa mga produktong petrolyo.
