Tiniyak ng Grains Retailers’ Confederation of the Philippines Inc. (GRECON) na may sapat na suplay ng bigas sa bansa, ngunit inaasahang tataas ng P1.50 hanggang P2 kada kilo ang presyo ng lokal at imported na bigas dahil sa pagtaas ng gastusin sa transportasyon dulot ng mahal na petrolyo.
Batay sa pinakahuling monitoring ng Department of Agriculture ngayong Marso 2026, ang presyo ng regular milled rice ay nasa P44–P46/kilo, well-milled rice sa P47–P49/kilo, at premium rice sa P52–P55/kilo.
Ayon sa GRECON, may ilang bahagi ng Metro Manila naitala nang tumaas ng halos P2 kada kilo ang presyo ng bigas kasunod ng unang bugso ng fuel price hikes na umabot sa halos P20 kada litro. Bagama’t hindi problema ang suplay, ipinapaliwanag na ang mataas na presyo ng langis ay nagdudulot ng dagdag gastos sa pagdadala ng bigas mula sa mga probinsya patungo sa merkado.
Dagdag pa rito, naapektuhan din ng global oil crisis at bagong rice import tariff system ang presyo ng imported rice. Para sa mga konsyumer, ang dagdag na P2/kilo ay katumbas ng P100–P200 dagdag gastos bawat buwan para sa pamilyang kumokonsumo ng 50–100 kilo ng bigas.
Malaki rin ang epekto nito sa mga carinderia at maliliit na negosyo na umaasa sa murang bigas para sa kanilang operasyon. Samantala, tiniyak ng Department of Agriculture na patuloy ang price monitoring at pinag-aaralan ang posibleng subsidy sa transport at logistics upang maibsan ang epekto ng mataas na presyo ng petrolyo.
