Naglangkaw an presyo kan Brent crude kasubanggi, umabot sa $107.92, habang an US crude nagtaas man sa $102.57. An pagtaas nag-abot matapos magwarning an Tehran laban sa posibleng paglusad nin tropang Amerikano. Sa kabilang banda, si Presidente Donald Trump nagpahayag na padagos an negosasyon tanganing matapos an giyera.
An Speaker kan Parlamento nin Iran nagsabi na an pwersa kan nasyon ‘naghahalat’ sa Estados Unidos. Mientrastanto, an rebelde na Houthi sa Yemen, na suportado nin Iran, naglunsar nin atake laban sa Israel asin nagdadara nin panibagong banta sa mga shipment nin lana. Pwede sinda magsara kan Bab al-Mandab Strait, chokepoint na importante sa global shipping lines.
Nagkaigwa nin miting an mga Foreign Minister kan Pakistan, Saudi Arabia, Egypt asin Turkey. Segun ki Foreign Minister nin Pakistan na si Ishaq Dar, produktibo an huring asin magpafasilitar an Pakistan nin negosasyon sa pagitan kan US asin Iran sa masunod na mga aldaw.
An giyera nagdara nin pinakamalaking disrupsyon sa lana sa kasaysayan huli sa pagsara kan Strait of Hormuz, kun sain 20% kan global na supply nin lana nag-aagi. Sa US, nagtaas an presyo nin gasolina sa average na $3.98 kada galon. Segun ki Bob McNally, presidente nin Rapidan Energy, an mga sadit na nasyon, partikular sa Asia, an mas matinding tatamaan, alagad magkakaigwa nin ripple effect sa bilog na ekonomiya.
Dagdag pa kan mga eksperto, dai basta-basta mabababa an presyo nin gasolina kahit matapos an giyera. Dakul an nakadepende sa pagbukas liwat kan Strait of Hormuz asin sa pag-ayo kan mga nasirang imprastruktura, arog kan Ras Laffan sa Qatar — an pinakadakul na pasilidad nin produksyon nin gas sa bilog na kinaban — na tinira nin Iran kan tunga nin Marso. Sa pinakadelikadong sitwasyon, an pagtaas nin presyo nin lana pwedeng matapos sa paagi nin resesyon.
Sa merkado, nagbaba man an stock futures kasubanggi: an Dow futures nagbaba nin 0.53% o 241 puntos, an S&P 500 futures nagbaba nin 0.46%, habang an Nasdaq futures nagbaba nin 0.48%.
Ini po an pinakahuring balita sa radyo. Padagos kami magdadara nin update sa krisis sa lana asin epekto kaini sa ekonomiya.
