Nagpakol na sa 46 na aksidente an nairehistro sa enot na quarter kan taon sa banwaan kan San Fernando, Camarines Sur.
Sa intrevista kan Bombo Radyo Naga ki Pcpt Israel Banaag, ACOP kan San Fernando MPS, sinaysay kaini na base sa datus, kadaklan sa mga insidente nagresulta sa physical injuries asin danyos sa pagsasadiri. Tinawan duon man kaini na perming nangyayari an mga aksidente sa oras nin rush hour, kun saen mas halangkaw an bilang kan mga behikulo asin mas sibot an dalagan kan trapiko.
Pigpaliwanag kaini na an nagkapira sa mga imbwelto sa mga aksidente mga menor de edad, na padagos na nagtatao nin angat sa pag-implementar kan mga ley sa trapiko asin disiplina sa tinampo.
Padagos an pagirumdom kan mga otoridad sa mga motorista na mag-ingat mantang nagmamaneho, orog na sa peak traffic hours, asin siguraduhon na magsunod sa eksistidong ley ngani na maibitaran an aksidente.
Pig-eengganyar man kan opisyal an mga magurang na bantayan an saindang mga aki asin siguraduhon na dae sinda tutugutan na magmaneho kun bako pa supisyente an edad asin igwa nin magkakanigong lisensya.
