Magbabalik sa trabaho sa House of Representatives of the Philippines si Cavite 4th district Rep. Francisco “Kiko” Barzaga ngayong linggo matapos pagsilbihan ang kanyang ikalawang 60-araw na suspensyon dahil sa “disorderly behavior.”
Ayon sa ulat, babalik sa Kamara ang mambabatas sa gitna ng kasalukuyang summer break ng Kongreso kung saan wala pang plenary sessions hanggang Mayo 4.
Sa kabila ng kontrobersiya at dalawang magkasunod na suspensyon na walang sahod, binigyang-diin na ang magiging batayan ng kanyang pananatili sa politika ay ang kanyang legislative performance.
Sa ilalim ng 20th Congress, nagsilbing principal author si Barzaga sa apat na panukalang batas, kabilang ang pagdedeklara ng Nobyembre 26 bilang special non-working holiday sa Dasmariñas City, panukalang absolute divorce sa Pilipinas, pag-alis ng 12% value-added tax (VAT), at mandatory disclosure ng foreign travel ng mga kongresista.
Bukod dito, co-author din siya ng apat pang panukalang batas na may kinalaman sa English proficiency, food labeling, at paggamit ng artificial intelligence sa pamahalaan.
Sa kasalukuyan, lahat ng walong panukalang batas ay nasa antas pa ng committee deliberations sa Kamara.
Nauna nang inaprubahan ang kanyang ikalawang suspensyon noong Pebrero 4, 2026, habang ang una niyang suspensyon ay ipinatupad mula Disyembre 1, 2025 hanggang Enero 30, 2026.
