Piglalaoman ngunyan na semana, an duwang importanteng desisyon dapit sa kaso na kinakahampang ni dating Presidente Rodrigo Duterte sa International Criminal Court (ICC), partikularmente sa isyu kan hurisdiksyon asin kumpirmasyon kan mga akusasyon kontra saiya.
Sa intrevista kan Bombo Radyo Naga ki Atty. Jojo Lacanilao (Convenor, Duterte Panagutin Network), an desisyon kan ICC Appeals Chamber sa hapot kun igwa pa nin hurisdiksyon an korte sa ibong kan pag-atras kan Pilipinas sa Rome Statute kan 2019 piglalaoman na mailuwas sa Miyerkules, Abril 22. Dati nang binasura kan Pre-Trial Chamber an petisyon na kampo kan petisyon hurisdiksyon kan ICC, na nagtulod kaini na mag-apelar sa mas halangkaw na korte.
An depensa nagrason na an ICC nawaran nin kapangyarihan pagkatapos na mag-atras an Pilipinas. Alagad, an prosekusyon makusog na nagmamantenir na an hurisdiksyon nagtitinir huli an imbestigasyon nagpoon kan 2018, bago pa man nagin epektibo an paghale kan nasyon .
Katakod kaini, hinahalat man sa katapusan kan Abril an desisyon kan Pre-Trial Chamber dapit sa kumpirmasyon kan mga akusasyon. Sa yugtong ini, sisiyasaton kun igwa nin maninigong ebidensya tanganing maipadagos an kaso sa tamang pagbista. Segun sa mga nagsunod sa hearing, an piskalya nagpresentar nin mga dokumento, testimonya, asin iba pang ebidensya na soboot nagkokonektar ki Duterte sa mga alegasyon, mantang nakatutok an depensa sa pagnegar sa interpretasyon kan mga pahayag asin ebidensya.
Kun makumpirmar an mga akusasyon, an kaso mapadagos sa sarong pormal na paglilitis kun saen an mas halangkaw na lebel nin ebidensya—beyond reasonable doubt—kaipuhan tanganing patunayan an pagkakasala o pagkainosente kan akusado.
Mientrastanto, kun magdesisyon an Appeals Chamber na kulang sa hurisdiksyon an ICC, piglalaoman na lubos nang isasara an kaso. Sa siring na sitwasyon, posibleng magbalik sa Pilipinas si Duterte na dae na maatubang nin kaso sa nasabing korte.
Sa isyu kan obligasyon kan gobyerno, may mga eksperto na nagnotar na pwedeng makipagtabangan an Pilipinas sa mga internasyunal na mekanismo arog kan Interpol, dawa ngani bako nang miyembro kan ICC, depende sa mga eksistidong ley asin kasunduan.
Sa ibong kan manlaen-laen na posibleng resulta, an mga representante kan mga biktima nag-insistir na an mayor na katuyuhan iyo an makamtan an hustisya asin masiguro an paninimbagan sa mga soboot pagbalgar sa human rights.
Padagos an mga abogado asin representante kan mga biktima padagos na nagmomonitor kan mga hearing sa The Hague, kun saen piglalaoman na maatendir an mga representante tanganing masaksihan an pagluwas kan mga desisyon sa mga masunod na aldaw.
