Nagbabala ang isang ulat na ang pagbaha, sunog, bagyo, at matitinding init na dulot ng climate change ay nagdudulot ng lumalaking banta sa demokrasya, matapos maitala ang hindi bababa sa 94 na halalan at referendum na naapektuhan sa loob ng dalawang dekada.
Ayon sa Stockholm-based International Institute for Democracy and Electoral Assistance (International IDEA), mula 2006 hanggang 2025 ay hindi bababa sa 26 na halalan at referendum sa 52 bansa ang naantala o na-postpone dahil sa mga natural na kalamidad.
Sa kabuuan, 94 na proseso ng eleksyon ang naapektuhan ng mga bagyo, baha, heatwave, wildfire, at landslide—mga sakunang pinalalala ng climate change na dulot ng pag-init ng mundo.
Sa ulat na inilabas kasabay ng Earth Day, binanggit na noong 2024 lamang ay 23 halalan sa 18 bansa ang naabala dahil sa matitinding kondisyon ng panahon.
Kabilang sa mga halimbawa ang epekto ng Hurricane Sandy sa 2012 US federal elections, lindol sa Turkey noong 2023, matinding heatwave sa 2025 Philippine elections, pagbaha at landslide sa Bosnia noong 2024 local elections, at mga bagyo sa Mozambique noong 2019 elections.
Ayon sa mga eksperto, mahalagang isaalang-alang ang tamang timing ng halalan upang maiwasan ang epekto ng kalamidad, at maaaring kailanganin ding baguhin ang mga election schedule sa ilang bansa.
Binigyang-diin din sa ulat na ang mga demokratikong institusyon gaya ng halalan ay dapat ituring na kritikal na imprastraktura na kailangang protektahan laban sa mga banta ng kalikasan.
Nanawagan ang mga may-akda na isama ang mga proseso ng eleksyon sa mga plano ng climate adaptation at disaster risk reduction ng mga bansa upang mapanatili ang integridad ng demokrasya.
