Nahahandal si Pangulong Ferdinand “Bongbong” Marcos Jr. na baligtadon ni Vice President Sara Duterte an saiyang mga polisiya enkasong maging presidente ini.
Ini an saiyang kasimbagan makalihis siyang haputon sa sarong entrevista kun igwa bang pagbasol an presidente na si Duterte an saiyang nakaibanang magdalagan komo mga pinakahalangkaw na opisyal sa gobyerno nasyonal kan nasyon.
Segun kay Marcos, mayo man siyang namamatean na sala an saiyang naging desisyon na makaibanan ang bise presidente sa kampanya alagad an pagbabago sa mga lakdang na saiyang pigpautob an saiyang pigkakahaditan na baguhon enkasong magdalagan an bise presidente sa masunod na pirilian asin manggana iniyo komo maribay saiya.
Marurumduman na nagdalagan sinda sa irarom kan pinagsarong tiket na UniTeam kan national elections 2022, kun sain nanggana si Marcos nin labing 31 milyong boto mantang labing 32 milyon man an nagpatukaw ki Duterte komo bise presidente.
Alagad nagpuon an pagkabaranga sa kampo kan duwa kan magbutas an bise presidente komo Sekretarya kan Department of Education (DepEd) kan Hunyo 2024. Katakod man kaini an saiyang pagbutas komo vice-chairperson kan National Task Force to End Local Communist Armed Conflict (NTF-ELCAC) kun sain makalihis kaini, nagpuon na an pagkakabareta nin pagiging kritiko ni Duterte sa administrasyon ni Marcos.
Digdi man napabareta na igwa suboot na ipigdesignar si Duterte na gadanon an presidente, an agom kaini na si First Lady Liza Araneta-Marcos, asin dating House speaker Ferdinand Martin Romualdez kun sain minuda man niya an mga ini sa sarong videoconference kaibanan an saiyang mga alyado asin supporters.
Kabali an nasambitang pagpapatakot sa ipigsangat na ikaduwang katiripunan nin Articles of Impeachment kontra ki Duterte sa irarom kan grounds na “Culpable violation of the Constitution, high crimes, and betrayal of public trust”—pira sa mga ipigrerekomenda kan 1987 Constitution para kasuhan nin impeachment an sarong halangkaw na opisyal.
Presenteng pighahalat an kampo ni Duterte na magpasa kan saiyang kasimbagan sa Senate impeachment court hasta alas siete nin pagkabanggi ngonian na Lunes parte kan mandato kan senator-judges na matukaw para sa sa saiyang pagdangog.
