Pasado na sa Kamara de Representantes an propuwestong ley na mabawal sa pagdalagan o pagtukaw kan mga opisyal na magkakaanak sa saro sanang lugar.
Sa botong 267 pabor, 20 dai tugot asin pitong abstain, nakalusot na sa bilog na hababang katiripunan an House Bill No. 8389 o an bersiyon kaini na masusupog sa kasuguang konstitusyonal na mabawal sa political dynasties.
Sa irarom kan propuwestong ley, hasta ikaduwang lebel nin magkakaanak o second degree of consanguinity and affinity an babawalan na magdalagan asin magtukaw sa mga elektibong posisyon sa pararehong termino.
Sa irarom kan panuntunan, kaipuhan man magpasar an Senado kan sadiri kaining bersiyon nin nasambitang lakdang ta nganing enkasong makalusot ini sa parehong Kamara, pwedesir ini magin ganap na ley kun aprubaran ni Presidente Ferdinand Marcos Jr. Marurumduman na saro ini sa pigbisto komo paryoridad na ley kan presidente sa tahaw kan pagigin miyembro kaini kan sarong dinastiya.
Kapwa man an mga principal author kan anti-political dynasty bill na sinda House Speaker Faustino “Bojie” Dy III asin presidential son House Majority Floor leader Ferdinand Alexander “Sandro” Marcos III na miyembro kan political dynasties.
Mientrastanto, pira sa mga nagboto nin ‘no’ sa nasambitang prupwesto sinda Akbayan Partylist Rep. Chel Diokno asin Kabataan Partylist Rep. Renee Co nin huli sa suboot pagiging ‘peke’ kainiyo.
Segun man sa mga kritiko, ideyal na mag-abot hasta fourth degree of consanguinity and affinity an pagbabawal sa pagtukaw sa mga posisyon kan gobyerno. Ini an suboot matao nin epekto sa nasambitang ley komo “enabling law” kan Konstitusyon.
