Nag-insistir si Gatchalian bloc na an saindang lakdang na baguhon an liderato kan Senado nakalinya sa mga eksistidong precedent asin sa desisyon kan Korte Suprema sa kaso kan Avelino v. Cuenco, na nagbisto asin valid an n sarong Quorom sa ibong kan bakong kumpletong presensya kan mga miyembro.
Marurumduman na an basehan kan pagbabago sa liderato kan Mataas na Kapulungan iyo an tolong aldaw na absence kan Cayetano bloc sa nakatalaan na mga sesyon, na iyo an nagkawsa kan pagdeklarar na bakante an gabos na posisyon sa Senado.
An nasabing pagbabago sa liderato pigbisto kan House of Representatives asin kan Malacañang.
Alagad, makusog na kinontra ini kan Cayetano bloc, na nanindugan na kaipuhan an 13 boto tanganing ideklarar na bakante an mga posisyon sa Senado, base suboot sa total na 24 miembros kaini. Kabale sa bilang iyo sinda Senador Jinggoy Estrada asin Ronald “Bato” Dela Rosa, na parehong dae aktibong presente sa mga sesyon.
Segun sa Partido Demokratiko Pilipino (PDP), na kabale ninda Dela Rosa, Bong Go, asin Robin Padilla na nakatalaan sindang magsangat nin petisyon sa Korte Suprema tanganing kuestionon an legalidad kan pagbabago kan liderato.
Sa lado kan Malacañang, sinabi ni Communications Undersecretary Claire Castro na igwa nin deretso an Cayetano bloc na darahon sa Korte Suprema an isyu alagad nanindugan na igwang presedente sa sesyon kan Senado kan 2015 kun sain pigmidbid an quorum of 12 na mayong pagtumang kan Korte.
