Nagpuon na an tolong (3) aldaw na General Medical Mission and Community Outreach 2026 sa banwaan nin Libmanan, Camarines Sur ngunyan na Biyernes, Hunyo 5.
Segun ki Dr. Eddie Palimo, municipal health officer kan lokal na gobyerno nin Libmanan, compuesto kan an nasambitang medical outreach nin libreng consultasyon, libreng bulong, libreng pagpaturi asin dental services na pig-oprecir sa primerong aldaw kaini.
Sa kahurutan ni Libmanan Mayor Edelson Marfil na maihatod sa mga constituentes an libreng asistencia medical, nareyalisar an aktibidad asin pinag-isponsoran ini kan Radyo Kalusugan sa pakikipagtabangan kan lokal na gobyerno kan banwaan, kaibanan an Asenso Libmanan Women’s Federation (ALWF) asin CDO.
Mayo man suboot na nagin limitasyon sa paghatud kan serbisyo medikal sa primerong aldaw kan aktibidad huli ta bastante an mga bulong para sa anuman na helang siring man vitamins. Gikan pa sa Makati Medical Health Center an mga doktor apwera sa mga retiradong mga personahe na presente man sa aktibidad, kun sain libreng ipigheras an saindang serbisyo para sa mga Libmaneños.
Nakatalaan man na ikundusir ngunyan na Sabado, Hunyo 6, an free legal consultation poon alas otso nin aga hasta alas singko nin hapon sa Libmanan Sport Complex. Igwa man ining free lawyer services na kun sain an gabos na Libmaneños pwedeng makapaghapot sa mga abogado nin libre manungod sa problema sa daga, negosyo asin iba pang konsultasyong legal.
Sa maabot na Domingo, Hunyo 7, liwat na ihahatod an libreng serbisyo medical sa Brgy. Cambalidio magpoon alas otso nin aga hasta alas singko nin hapon.
Pinaglalaoman na aaprobitsaran ini sa mga yaon sa coastal area huli ta harayo an saindang lugar sa Poblacion rason kan bihirang pagpakonsulta sa doktor kan mga residentes.
