Nahihiling kan Duterte Panagutin Network na si Senador Sherwin Gatchalian an pinakaakseptableng opisyal ta nganing maging Senate President sa halangkaw na Kamara kan Kongreso.
Sa parte kan naging intrevista kan Bombo Radyo Naga kay Atty. Jojo Lacanilao, an convenor kan nasambitang grupo, an personalidad kan senador na pagigin tranquilo, stable, asin mayong pigkikilingan na lado o daing partisan an pwedesir na kalidad na nahiling kan Senado kun kaya siya an pigpili na bagong lider.
Dugang pa ni Lacanilao, mayo man na masyadong kaiwal an Senate President kaya dawa an mga miyembro kan bagong minorya nirerespeto an saiyang pagkakapili sa posisyon.
Marurumduman na sa magkakasuway na intrevista, ipigpahayag ninda Senadora Loren Legarda, Pia Cayetano, asin Camille Villar na susuportaran ninda an pagka-Senate President ni Gatchalian asin an concern man sana ninda iyo an mabilog an numero na 13 ta nganing ideklarang balido an elekasyon kan bagong pinakahalangkaw na lider kan katiripunan.
Afuera pa digdi, magiging patas man suboot si Gatchalian sa saiyang liderato ta nganing maibitaran an pag-alma hali sa publiko o public scrutiny.
Saro man sa pigsimbagan ni Lacanilao an urulayan manungod sa pagkakadesignar kan presiding judge sa ikokondusir na impeachment trial kontra kay Vice President Sara Duterte. Sa hiling kaini, pigkukunsidera kan Senado an kaaraman kan sarong lehislador sa ley kun kaya kinakaipuhan na sarong abogado an mangenot sa paglilitis mantang nahihiling man kaini na kakayanon man kan Senate president an mandato kun ma-preside man lang sana sa proseso.
Dai man suboot magugustuhan kan publiko kun si Senador Chiz Escudero utro an patutukawon komo presiding judge kan impeachment nin huli sa dai pagtubod sa kasuguang konstitusyonal na “forthwith” kan enot na makaabot sa sainda an articles of impeachment taong 2025.
Mientrastanto, nagtutubod man si Lacanilao na importanteng madagos an impeachment ta nganing urog na mahiling kan mga namamanwaan an ebidensya na pigsangat kontra sa bise presidente. Sa tahaw suboot ini kan estratehiya kan Cayetano bloc na ibasura an mga kaso kan impeachment.
