Labi sa 6,300 na mga pulis an ipapalakop sa palibot kan Senado ngunyan na aldaw Lunes, Hulyo 6, 2026, bilang seguridad kasabay kan pagpoon kan Impeachment Trial ni Vice President Sara Duterte.
Segun ki Philippine National Police-National Capital Region Police Office (PNP-NCRPO) spokesperson Police Major Hazel Asilo, kadaklan sa mga linalaoman na pagtiripon nakatuon sa hampangan kan Senado.Igwa man sarong grupo na nagpaplanong magsagibo nin pag-martsa pasiring sa Senado gikan sa pagtaraid na lugar, kun kaya magdadagdagan pa an mga tauhan kan pulisya.
Mientrastanto, dawa na mayo pang naaprubaran na permit para sa anuman na rally, sinabi ni Asilo na bukas an PNP-NCRPO sa mga grupong boot magsagibo nin protesta bastang masunod sa tamang proseso. Apwera pa digdi, mapautob man nin maximum tolerance an pulisya enkaso puporbaran na magdulok kan mga raliyista sa hampangan kan Senado.
I-enoton suboot an dayalogo asin negosasyon sa paagi kan mga itinalagang negotiation teams, mantang nakaantabay naman an mga public order units kun kinakaipuhan.Dai pa maisihan kan pulisya an inaasahan na bilang kan mga mapartisipar sa mga kilos-protesta, alagad pigsierto kaining handa sindang simbagan an anuman na sitwasyon na may koneksyon sa seguridad.
Marurumduman na na-impeach si VP Sara kan House of Representatives kan Mayo huli sa mga alegasyon kan Culpable Violation of the Constitution, Graft and Corruption, Bribery, Betrayal of Public Trust, asin iba pang magagabat na krimen. Kan Hunyo 1, nagsunad man an kampo ni VP Sara Duterte kan saindang kasimbagan sa Articles of Impeachment asin hinagad sa impeachment court na ibasura an kaso.
Nakatalaan magpoon an impeachment trial sa ganap na alas-2 nin hapon ngunyan na aldaw. Isasagibo muna an mga pagdangog tuyong Lunes hasta Miyerkules hasta sa ikalimang State of the Nation Address (SONA) ni Pangulong Ferdinand Marcos Jr. sa Hulyo 27.Pagkatapos kan SONA, ililipat an mga pagdangog tuyong Martes hasta Huwebes nin alas-2 nin hapon.
Mientrastanto,, pansamantalang isasara kan gobyerno kan Pasay City an parte kan Diokno Boulevard harani sa Senado habang isinasagibo an pagdangog. Kabali sa isasara an northbound asin southbound lanes magpoon sa Seaside Boulevard hanggang Atang dela Rama Street, kabali an mga interseksyon sa naturang lugar.
Ipapautob an traffic scheme Hulyo 6, tuyong Lunes, Martes asin Miyerkules, poon alas-7 nin aga hanggang alas-7 nin banggi.
Pinaigting man an seguridad sa Sandiganbayan asin Office of the Ombudsman kasunod kan pagsunad nin kasong plunder laban ki Senator Rodante Marcoleta.
