Kampante an House Prosecution Panel na maipipresentar man giraray ninda nin marhay an isyu kan Confidential Funds ni VP Sara Duterte, dawa na dai tugutan na ipresentar an bank, tax, asin iba pang financial records kan Bise Presidente.
Inot nang naghagad an House Panel sa Impeachment Court nin subpoena tanganing makua an financial records kan Bise Presidente asin maipresentar ini sa masunod na semana.
Segun ki House Prosecutor Rep. Bel Zamora, igwa sinda nin sapat na ebidensya tanganing suportaran an alegasyon manungod sa iregularidad sa paggamit ni VP Sara kan saiyang confidential asin intelligence funds. An mga ebidensyang ini naghali sa duwang opisina ni VP Sara—an Office of the Vice President asin an Department of Education.
Maski importante an mga dokumentong naglalaog nin bank asin financial records kan Bise Presidente, sinabi ni Zamora na kaya pa giraray kan panel na mapatunayan an gabos na alegasyon, dawa na dai mailuwas an laog kan kontrobersiyal na Bureau of Internal Revenue (BIR) Box.
Sa ibong kaini, nagtutubod an lehislador na mayo nin rason tanganing dai tugutan an kahagadan kan House panel, huli ta dai man ini balgar sa ley na ipresentar an financial records kan Bise Presidente sa Impeachment Court na nagdangog kan verified complaint laban saiya.
Piglalaoman na mapoon na sa masunod na semana an pagtalakay sa isyu kan Confidential asin Intelligence Funds ni VP Sara Duterte.
