Ikinaogma kan prosekusyon an desisyon kan Senate Impeachment Court na magpaluwas nin subpoena para sa Bank records, AMLC reports, asin tax documents ni Vice President Sara Duterte asin kan saiyang agom na si Atty. Manases Carpio.
Segun sa House prosecution panel, dakulang trayumpo ini para sa saindang lady huli sa matao ini nin mas dakulang na ebidensiya tanganing mapatunayan an pinag-aakusaran na “unexplained wealth” kan Bise Presidente.
Binasa ni Senate Presiding Officer Francis “Chiz” Escudero an Ruling sa ika-pitong aldaw kan paglilitis, kun saen tinawan doon kan korte na natunugan kan mga hinahagad na dokumento an mga rekisitos kan Impeachment Proceedings. Malinaw an saindang deskripsyon, madali sindang matukoy, asin igwang prima facie relevance sa mga alegasyon.
Kabali sa subpoena an records kan 19 na corporate entities na konektado sa mag-agom, base sa saindang General Information Sheets, Articles of Partnership, asin mga SALN hale 2022 sagkod 2025.
Tinuligsa kan depensa an subpoena asin inapod ini nin “fishing expedition” asin labag sa due process. Alagad sigun sa korte, dai puwedeng maging hadlang an Bank Secrecy Law asin Confidentiality Provisions kan Anti-Money Laundering Act sa kapangyarihan kan Senado bilang Impeachment Court.
Sa desisyon, binanggit man kan tribunal an precedent kan impeachment trial ni dating Chief Justice Renato Corona, kun saen pinirit na ipaluwas an saiyang tax records. Para sa prosekusyon, an pagbubunyag kan mga financial records matao nin mas malinaw na eksplinasyon kan pinaghalean kan kayamanan ni Duterte asin maserbing matibay na batayan kan saindang kaso. An lakdang na ini kinukunsiderar na importante sa pagtukoy kun igwa talagang katiwalian asin salang paggamit kan kapangyarihan sa panig kan Bise Presidente.
