Nag-anunsyo an Estados Unidos na nagkaigwa sinda nin Nuclear Energy deal kaiba an Saudi Arabia bilang parte kan pagpapakusog kan kooperasyon sa larangan nin enerhiya.
Pinanginutan ni US Secretary of Energy Chris Wright asin Saudi Minister of Energy His Royal Highness Prince Abdulaziz bin Salman an pagpirma kan Nuclear Cooperation Agreement.
Segun sa US Department of Energy, kaiba sa kasunduan an Bilateral Safeguards Agreement na magsisilbing gabay sa ligtas asin responsableng paggamit kan Nuclear Energy.
Idinagdag kan ahensya na an kasunduan an magigin “Legal Foundation” para sa sarong panghaloyan asin multi-bilyong dolyar na partnership kan duwang nasyon.
Huli kan kasunduan, magkakaigwa nin oportunidad an mga kompanya kan Estados Unidos na makaakses sa Saudi Nuclear Energy Program.
An nasabing Nuclear Agreement dadarhon pa sa Kongreso kan Estados Unidos para sa pagrepaso bago an masunod na proseso.
