Padagos an serye nin mga pag-atake kan militar kan Estados Unidos laban sa Iran, na nakaabot sa ika-13 na magkasunod na banggi.
Susog sa media kan estado kan Iran, apat katawo an nagadan asin lima pa an nalugadan sa pinakahuring mga airstrike na tumama sa mga pasilidad militar asin komersyal sa Bandar Abbas asin Qeshm Island.
Ipinahayag ni Presidente Donald Trump kan Estados Unidos na gagamiton kan Washington an mga nagyelo na mga pagsadiri kan Iran tanganing bayadan an anuman na danyos sa mga barko, kargamento, asin iba pang mga kaugnay na operasyon.
Inapod niya ining “patas asin pantay-pantay,” alagad an Ministro kan Iranian na si Abbas Araghchi pigkondenar ini bilang sarong “peligrosong presedente.”
Susog sa US Central Command (Centcom), an saindang operasyon nagpuntirya sa mga sentro nin pagboot kan militar kan Iran, mga pasilidad sa pagtipig nin mga drone, mga network nin komunikasyon, mga lugar nin pagbantay sa baybayon, asin mga kakayahan sa kadagatan tanganing paluyahon an kakayahan kan Iran na bantahon an mga sibilyan na barko sa rehiyon.
Mientrastanto, an mga pag’atake kan mga Houthi na suportado kan Iran sa duwang Saudi tanker sa Dagat na Pula nagcausa nin takot, na nagdara kan presyo kan lana na naglangkaw sa labing $100 kada bariles—an pinakahalangkaw poon kan Mayo.
Sarong tanker sana an ibinareta na nag-agi sa Strait of Hormuz kan Hulyo 24, an pinakahababang bilang poon kan Mayo 7, na nagpaparisa kan grabeng epekto sa pankinaban na komersyo.
