Target kan Department of Energy (DOE) na itao an sentralisadong subasta para sa mid-merit natural gas power plants sa ikaapat na kwarter kan 2026 bilang parte kan paghihingoa kan gobyerno na mapakusog an suplay nin kuryente sa nasyon.
Sigon ki Energy Secretary Sharon Garin, nakikipagkoordinar na an DOE sa manlaen-laen na ahensya asin sa Independent Electricity Market Operator of the Philippines (IEMOP) ngani na isagibo an bidding.
Katuyuhan kan programa na ma-engganyar an pagtogdok asin pagpahiwas kan natural gas power plants na pwedeng magamit kun halangkaw an pangangaipo sa kuryente.
Ipinaliwanag kan hepe kan DOE na mas marikas an pagresponde kan natural gas power plants kumpara sa coal-fired power plants, kun kaya mas nakakatabang an mga ini sa paglikay sa kakulangan nin supply nin kuryente, lalo na sa panahon na halangkaw an konsumo.Balitang Pilipinas
Alagad, sinabi man kaini na mas halangkaw an gastos sa paggamit nin natural gas kumpara sa karbon.
Apwera sa natural gas, pinaparikas man kan DOE an implementasyon kan mga proyekto sa renewable energy.
Kabali digdi an Green Energy Auction 8 na nakasentro sa mga proyekto sa Mindanao asin an Green Energy Auction 9 na nakatagama para sa solar-on-stilts asin agrisolar projects.
Segun sa DOE, pigpipinal na ninda sa ngunian an mga kinakaipuhan na kasunduan sa Department of Agriculture ngani na magin maray an implementasyon kan mga nasabing proyekto.
