Tinawan-duon ni Senator Bong Go na dapat an mga obrerong Pilipino an direktang makamati kan pag-uswag kan ekonomiya kan nasyon, matapos opisyal na ideklarar kan World Bank an Pilipinas bilang kabali sa Upper-Middle-Income Country.
Sigun ki Go, ironic na sa ibong kan deklarasyon kan World Bank sa pag-uswag kan ekonomiya kan nasyon, haros 14.5 milyon na pamilya, an kinokonsiderang nagtitios base sa mga pag-aadal.
Huli digdi, tinawan doon kan senador na an pagbistong ini dapat magresulta sa pagbukas nin mas kadakol na trabaho asin pagtao nin tama asin marhay na pasahod tanganing matustusan kan mga pamilyang Pilipino an saindang pang-arualdaw na pangangaipo.
Segun pa sa Senador, an pagtios na nararanasan kan mga minimum wage earners kawsa kan pagmahal kan mga barakalon, na nadadagdagan pa kan pagtaas kan presyo kan mga produktong petrolyo.
Katakod kaini, pinakondena liwat kan senador an ipinaluwas na Temporary Restraining Order o TRO kan Pasig City Regional Trial Court laban sa inaprubaran na P85 na aldawan na dagdag-sweldo para sa mga obrero sa Metro Manila.
Nangangapodan an senador sa korte na ikonsiderar an Article 126 kan Labor Code, kun sain nakasaad na dai dapat makapagluwas an korte, tribunal o ano man na ahensya nin TRO laban sa proseso kan National Wages and Productivity Commission o NWPC asin Regional Tripartite Wages and Productivity Boards o RTWPB.
Ipinunto man ni Go na an P85 na dagdag-sweldo mas hababa pa sa saiyang panukalang P100 na wage hike para sa mga obrerong Pilipino, bako sana sa Metro Manila kundi sa gabos na rehiyon kan nasyon.Kasabay kaini, nangangapodan ini sa Kongreso na ipasar na an naturang panukala tanganing makatabang ini sa mga empleyado asin sa saindang mga pamilya.
