NAGPOON na an Padjak Asenso sa irarom kan Tabang sa Kabuhayan kan Ako Bicol Party List asin pinaglalaoman na maarangkada naman ini sa probinsya nin Camarines Sur sa masunod na semana.
Sa intrevista kan Bombo Radyo Naga ki Salieh Luces, Regional Community Connections Program Officer kan Ako Bicol Party List, pinunan na an programa sa probinsya kan Albay asin padagos an saindang isinasagibong post evaluation huli ta kan nakalihis na Hulyo 3, 2026 asin makalihis an sarong bulan sainda ining binabalikan tanganing kumustahon asin imonitor.
Digdi ninda inaaram kun ano an mga angat na naeksperienciahan kan mga benepisyaryo tanganing mas mapakaray pa an saindang negosyo.
An Padjak Asenso saro sa programa kan AKB Party list na kun sain saro ining food cart na libreng itinatao sa mga napipiling benepisyaryo kabali na an nagkantidad na P5,000 worth na mga produkto na pinupunan kan mga benepisyaryo sa pagtitinda asin an mga tools and equipment na gamit sa pagluluto, kumpleto ng itinatao sa benepisyaryo.
Libre man na itinutukdo an tamang pagluto kan pagkakan na saindang itinitinda tanganing mas maging epektibo asin kumita an saindang negosyo.
Makalihis an tolong (3) bulan liwat ninda ining bibisitahon tanganing mamonitor an saindang negosyo komo parte kan ebalwasyon na boot sabihon, dai sana natatapos an pagtabang kan AKB sa pagtao sana kan food cart kundi tanganing masierto na ligtas, malinig asin tama an food handling kan mga ini.
Sigon ki Luces, nagkaigwa na nin 15 benepisyaryo sa Legazpi sa 10 sa Tabaco an Padyak Asenso asin nakatalaan man na isistribwer sa masunod na semana an mga food carts sa mga napiling benepisyaryo sa banwaan kan Milaor, Gainza asin sa Syudad nin Naga.
