Nagproponer an Administrasyong Marcos nin P10.773 bilyon na Confidential and Intelligence Funds (CIF) sa lindong kan 2027 proponidong national budget.
An proponidong Confidential and Intelligence Funds (CIF) mas hababa nin 8.8 por ciento kumpara sa P11.818-B na nakatagama para sa 2026.
An executive branch nagrekomendar nin P4.368 bilyones para sa confidential funds mantang P6.405-B para sa intelligence funds.
Susog ki Acting Budget Secretary Kim Robert De Leon, an mga ahensya sana na lehitimong awtorisado na maggibo nin mga kompidensyal asin intelihensya na mga trabaho an makakaresibe kan siring na mga pondo sa irarom kan National Expenditure Program (NEP) para sa taon piskal 2027.
Pigsierto kan sekretaryo na masasairarom sa eksistidong budgeting, utilization, liquidation asin auditing rules an paggamit kan CIF ngani na maseguro an accountability asin magamit an pondo sa tunay na katuyuhan kaini.
Mientrastanto, an executive branch nagproponer nin P111.98 billion na Unprogrammed Appropriations (UA) para sa 2027, na sinabi kan Department of Budget Management na iyo an pinakahababang kantidad kan Unprogrammed Appropriations (UA) poon kan 2019.
An dakulang porsyon kaini itatao para sa pagpondo kan mga proyektong tinatabangan kan mga dayuhan. Inasegurar kan House Committee on Appropriations Chairperson Mikaela Suansing na dae ninda tutugutan na pondohan an mga flood control projects gamit an unprogramed appropriations asin gagastuson sana ini sa mga items na tunay na kinakaipuhan.
An deliberasyon kan P7.2 trillion national budget proposal sa lower house nakatalaan na magpoon sa Agosto 17 sa paagi kan briefing kan Development Budget Coordination Committee.
