Suportado kan Department of Budget and Management (DBM), na naghanda asin nagbalangkas kan National Expenditure Program (NEP) kan administrasyon ni Marcos, an pag-live stream kan mga deliberasyon kan Bicameral Conference Committee manungod sa panukalang P7.2 trilyong pambansang budget para sa 2027.
Sigon ki Budget Acting Secretary Kim de Leon, igwa nin mga diskusyon manungod sa pagbukas kan mga deliberasyon kan bicam sa publiko, kasabay kan pag-uswag kan panukalang budget sa Kongreso.
Huli kaini, sinabi kan sekretaryo na welcome sa departamento asin suportado ninda an mga lakdang pasiring sa mas bukas asin mas transparent na proseso kan Bicameral Conference Committee.
Sigon pa digdi, makakatabang an transparent na deliberasyon sa budget tanganing mas maintindihan kan publiko kun paano ginagamit an kwarta kan mga taxpayer.
Makakatabang man ini sa pagpakusog kan pananagutan asin pagtitiwala kan mga tawo sa gobyerno.
Enkaso madagos ini, ini na an ikaduwang pagkakataon na isasagibo an livestreaming kan bicam deliberations, kasunod kan kainot enoting pagbukas kaini sa publiko kan Disyembre 2025, habang pinag-aadalan an 2026 national budget.
Para sa kaaraman kan publiko, sa Bicameral Conference Committee o Bicam deliberations, pinagkakasundo kan Senado asin kan House of Representatives an mga pagkakaiba sa bersyon kan budget bill na ipinasa ninda.
