Inabot nin 32 minutos an Presiding Officer asin Senate President Francis “Chiz” Escudero tanganing magpaluwas nin desisyon manungod sa sarong online post kan Agosto 12, 2026 ni Atty. Virgil Ligutan na pinag-oolayan an soboot paggamit nin mga nakakaraot na hapot sa pag-cross-examine.
Sa saiyang desisyon, tinawan man nin duon kan Presiding Officer an paggamit nin bakong maninigong mga tataramon sa nagpapadagos na impeachment trial laban ki Bise Presidente Sara Duterte, arog kan “scam,” “scammer,” asin iba pang kaagid na mga alegasyon.
Paliwanag ni Escudero, dawa nagtitinir na bukas sa publiko an impeachment court, dae niya nanggad tutugutan na magkaigwa nin trial by publicity, partikular na an paggamit kan social media platforms para pag-olayan an merito asin iba pang bagay na may kinaaraman sa kaso.
Huli kaini, nagpaluwas nin mahigot na patanid an Presiding Officer asin nagpatanid na posibleng mag-imponer nin labi pa sa sarong pormal na patanid an korte ki Ligutan, sa bilog na grupo kan piskalya, sa defense counsel, asin magin sa mga Senator-Judges kun otrohon ninda an parehong gawe-gawe mantang nag-paapdagos an paglilitis.
Liwat niyang pinagirumdom an gabos na partido na tulos na ipundo an pagpost nin ano man na komento o isyu manungod sa paglilitis sa arin man na social media pages.
Nanindugan an senador na malinaw na nakakadanyar sa integridad asin fairness o imparciality an paggamit kan social media sa pagpursige kan sarong isyu o pag-impluwensiya sa opinyon kan publiko sa luwas kan impeachment court.
