Ligtas alagad dai pa nagpapahiling an kapitan kan M/V June Aster, sa Maritime Industry Authority (MARINA) para sa imbestigasyon sa nangyaring kasulo sa katubigan kan Coron, Palawan an barko
Kinumpirma kan MARINA an kaligtasan kan kapitan sa paagi kan kumpanya kan barko, alagad padagos ninda ining hinahanap para makua an saiyang pahayag.
Importante an saiyang testimonya sa padagos na imbestigasyon kan insidente asin tanganing maaraman kun igwa nin nalapas na maritime safety regulations.
Kun mapatunayan na may paninimbagan sa ano man na paglapas, pwedeng mag-atubang an kapitan nin administratibong kaso.
Nagsiklab an kalayo mantang nagbibiyahe an barko sa Coron, na tulos man na tinabangan kan Philippine Coast Guard para sa rescue asin firefighting operations.
Padagos an komprehensibong imbestigasyon kan MARINA tanganing maaraman an ginikanan kan kalayo asin surion an seaworthiness kan iba pang barko kan kumpanya.
