Nagpepreparar an transport group na PISTON para sa ikukundusir na malawakang transport strike bilang makusog na pagkontra sa sunod-sunod asin padagos na paglangkaw kan presyo kan mga produktong petrolyo sa nasyon.
Segun ki PISTON National President Modesto Floranda, bilog an saindang suporta sa duwang aldaw na transport strike na ikakasa kan grupong MANIBELA poon Lunes, Setyembre 14, alagad nagpaplano man an saiyang grupo nin mas halabang untok-pasada na sa ngunyan isinasapinal pa.
Tinawan-doon ni Floranda na bakong supisyente an inaalok na fuel subsidy kan gobyerno para sa mga tsuper asin operator, mantang nagdadanay an paninindugan kan saindang hanay na kaipuhan nang tulos na ibasura an Oil Deregulation Law.
Paliwanag kan lider-tsuper, sa laog nin 28 taon na pagpautob kan nasabing ley, padagos sanang pinapasakitan an mga driver asin an mga namamanwaan huli sa kawaran nin kontrol sa kontroladong paglangkaw kan presyo nin krudo sa merkado.
Liwat man na nagpatanid an industriya nin krudo na laoman na naman an bagong paglangkaw sa presyo kan petrolyo sa masunod na semana na orog na magpagabat sa pasanon kan pampublikong transportasyon.
