Nag-orden an Korte Suprema sa Kongreso na magpasa nin angay na ley kontra sa ‘political dynasties’ sa Pilipinas.
Sa naganap na En Banc Session kan Korte Suprema, idineklara na dapat sunudon kan Kongreso an nakasaad sa probisyon kan Article 2, Section 26 kan Konstitusyon.
Kabali suboot sa mandato kan Kongreso an paggibo nin ley na nagbabawal sa pagkaigwa nin ‘political dynasties’ sa nasyon.
Segun sa hukuman, an dai pagtupad kan Kongreso sa saiyang mandato o responsibilidad pwedeng ibilang na ‘grave abuse of discretion’ sa laog nin 39-taon na dai pagpasa kan nasabing ley.
Huli kaini, ipinag-orden na kan Korte Suprema an tulos na pagpasa kan ley, an pakahulugan kan ‘political dynasties,’ asin an pagdeterminar kan magigin sakop kan prohibisyon.
An orden na ini nakabase sa pag-aprobar kan mga petisyon na nagkukuwestyon sa dai paghiro o pagpasa kan Kongreso nin ley kontra sa ‘political dynasties’.
Segun pa ki Spokesperson Atty. Camille Ting, base sa iniluwas na ruling kan Korte Suprema, bakong supisyente an mga ley sa presente tanganing matupad an ipinag-oorden kan konstitusyon.
Dawa igwa na suboot nin ‘existing laws,’ an katuyuhan kan prohibisyon iyo na magin pankagabsan an implementasyon asin bako sana sa piniling sektor kan gobyerno.
