Posibleng ibaba giraray kan Land Transportation Franchising and Regulatory Board (LTFRB) an pamasahe sa mga pampublikong sasakyan kun bumaba o magin stable an presyo kan petrolyo sa masunod na mga bulan.
Sa sarong panayam kan Bombo Radyo Philippines ki LTFRB Acting Chairman Greg Pua Jr., sinabi niya na andam sindang pag-adalan an fare rollback kun igwang maghahain nin petisyon para digdi.
Paliwanag ni Pua, bakong bago an siring na lakdang huli ta kan 2018, nagpatupad man an ahensya nin bawas-pasahe kasunod kan dakulang pagbaba sa presyo kan krudo.
Naroromdoman na epektibo ngunyan na Setyembre 28 an bagong minimum na pamasahe na Php 14 sa traditional jeepney asin Php 17 man sa modern jeepney.
Base sa inisyal na assessment kan LTFRB, haros gabos na pampublikong sasakyan an nagsusunod na sa bagong pamasahe.
Alagad, nakaresibe an ahensya nin reklamo hale sa nagkapirang Transport Network Vehicle Service (TNVS) driver huli ta dae pa suboot ipinapatupad kan mga Transport Network Company (TNC) an inaprubaran na dagdag-pasahe.
Paliwanag ni Pua, igwang sistema an mga TNC kaya naaatrasar an pagpapatupad kaini. Nagbabala man an opisyal na posibleng pagpapaliwanagon an mga kumpanyang dae masunod sa bagong pamasahe.
Lininaw man ni Pua na dae pa kaipuhan na kumuha nin bagong fare matrix an mga jeepney driver asin operator. Tama na nguna an fare guide na pwedeng i-download nin libre sa website kan LTFRB asin ipa-print.
