Inabswelto na kan Sandiganbayan Second Division si dating Department of Health (DOH) Secretary asin presenteng Iloilo 1st District Rep. Janette Garin sa kasong graft and malversation of public funds related sa kontrobersyal na pagbakal kan Dengvaxia vaccine kan 2015.
Basado sa desisyon kan korte, napag-araman na kulang an ebidensya na nagpapahiling na may malisyosong intensyon o grabeng kapabayaan si Garin sa implementasyon kan nasabing national immunization program.
An kaso nagpoon sa pagbakal kan gobyerno kan Disyembre 2015 nin poco mas o menos P3.5 bilyon na kantidad kan bakuna gikan sa higanteng parmasyutiko na Sanofi Pasteur kan huring parte kan administrasyon ni Aquino.
Ginibo an immunization program kan bulan nin Abril 2016 kun sain labi sa 800,000 na mga estudyante sa pampublikong eskwelahan sa Central Luzon, Calabarzon, asin National Capital Region an natawanan nin dosis para labanan an naglalangkaw na kaso nin dengue.
Alagad, an programa pinundo kan Nobyembre 2017 pagkatapos na an Sanofi nagpaluwas nin patanid na an bakuna pwedeng magcausa nin mas grabeng mga sintomas sa mga indibidwal na dai pa nanggad nagkaigwa nin dengue, na nagkawsa nin lakop na kontrobersiya asin serye nin mga kaso laban sa mga opisyales sa salud.
Sa ibong kan mga kaso sa manlaen-laen na korte, an kampo ni Garin nag-insistir na an pagkua ginibo sa marhay na boot para sa salud kan publiko asin sosog sa mga eksistidong ley kan gobyerno.
