Nagpahayag nin paghadit si Senador Sherwin Gatchalian manungod sa nagdadangadang na paglangkaw kan singil sa kuryente, na pighuhuna na mas lalong magpapabigat sa mga konsumidor na sa ngunyan nagtitios na sa paglangkaw kan inflation sa nasyon.
Idinugang niya na an posibleng paglangkaw na ini an mas lalong magpapalala sa pinansyal na pasanon kan mga pamilya, orog na ngunyan na padagos an paglangkaw kan presyo kan mga pangenot na bilihon asin serbisyo.
“Nakakagulat, dahil ang ating consumers right now, ang ating mga kababayan, hirap na hirap na sa pagbayad ng mataas na presyo ng bilihin lalo na ng bigas. Ngayon after tumaas ang inflation, tataas na naman nag singil ng Meralco in the coming few days,” an sabi ni Gatchalian.
Segun sa Meralco, maabot sa P15.0615 kada kilowatt per hour an singil sa kuryente ngunyan na Oktubre, na mas halangkaw nin P0.3191 kada kWh kumpara sa P14.7424 kan Setyembre. Idinugang pa kan kumpanya na ini huli sa halangkaw na presyo kan gasolina asin iba pang fuel.
Kasabay kaini, nairehistro kan Philippine Statistics Authority an 7.2 porsiyentong inflation kan Setyembre, an pinakahalangkaw na lebel ngunyan na taon.
Sinambit man kan senador na an presyo kan kuryente sa Pilipinas an ikaduwa sa pinakahalangkaw sa Southeast Asia, kasunod kan Singapore.
Idinugang pa kan senador na halangkaw an singil sa kuryente sa Visayas asin Mindanao sa ibong kan parating yellow asin red alert sa mga power grid. Segun ki Gatchalian, kaiba sa mga rason an dai marhay na paggana kan mga transmission line sa pag-ultanan kan mga rehiyon.
Segun pa ki Gatchalian, dai dapat palampason ini asin maninigo sana na magkaigwa nin konkretong solusyon.
Inatasan man ni Gatchalian an Department of Energy asin an Energy Regulatory Commission na masinsinang siyasaton an mga fuel pass-through charges na nagigin kawsa kan halangkaw na singil kan kuryente.
