Isinapubliko kan Energy Regulatory Commission (ERC) an Resolution No. 34, Series of 2026 tanganing halion an limitasyon sa kapasidad kan mga itutugdok na planta nin kuryente sa nasyon.
Sa irarom kan bagong kasuguan, binuwag na an dating limitasyon na 600 megawatts kada unit sa Luzon asin 150 megawatts man sa Visayas asin Mindanao.
Segun ki ERC Chairperson asin CEO Atty. Francis Saturnino C. Juan, katuyuhan kan repormang ini na mag-engganyo nin mas dakol pang investment asin pakusugon an kompetisyon sa merkado nin kuryente.
Linalaoman man na makakatabang an lakdang na ini tanganing masiguro an supisyenteng suplay nin kuryente asin mapababa an presyo kan singil para sa mga consumer.
Tanganing mapagdanay an katatagan kan nasyunal na grid, kaipuhan na magsairarom an lambang ipigsusuhestyon na planta sa System Impact Study na gigibuhon kan National Grid Corporation of the Philippines o kan mga accredited provider kaini.
Inatasan man an System Operator na repasuhon liwat an mga kaipuhan na reserve asin ancillary services para sa paglaog kan mas darakulang planta.
Magigin epektibo tulos an nasabing resolusyon pagkatapos ining opisyal na maisapubliko sa Official Gazette o sa peryodiko na may pankagabsan na sirkulasyon.
