Nagadan na si dating Representante kan enot na distrito kan Northern Samar na si Raul Daza sa edad na 91.
Kinumpirma ini kan saiyang pamilya matapos an limang dekada nin pagserbisyo sa publiko.
Dugang pa kan pamilya na bako sana siya nagin matrayumpo sa saiyang linya nin pagserbisyo, kundi nagin man siyang bar topnotcher asin sarong certified public accountant.
Nagin miyembro si Daza kan Liberal Party (LP) sa laog nin 61 taon asin siya an naglaban sa deklarasyon ni dating Pangulong Ferdinand Marcos Sr. kan Martial Law.
Nag-self exile siya sa US matapos magpaluwas nin mandu si Marcos na arestuhon siya, asin duman sa California niya ipinadagos an paglaban sa gobyerno.
Matapos an duwang taon kan mapaslang si dating Senador Benigno Aquino Jr. sa Manila International Airport kan Agosto 21, 1983, nagbalik si Daza sa Pilipinas asin nagin sarong tahimik alagad importanteng persona sa Liberal Party para sa eleksyon kan 1986.
Itinalaga siya sa manlaen-laen na posisyon matapos an EDSA People Power, arog kan Presidential Commission on Good Government asin nagin man siyang Commissioner kan Presidential Commission on Constitutional Reforms.
An saiyang apo na si Niko Raul Daza an presenteng representante kan enot na distrito kan Northern Samar.
