Nagkapirang mga lehislador, hinamon an China na Humali sa Teritoryo asin Igalang an Karapatan kan Pilipinas
Hinamon ni Mamamayang Liberal Party-list Rep. Leila de Lima an China na humali sa teritoryo kan Pilipinas asin patunayan an sinasabi kaining katuyuhan para sa katuninungan, kasunod kan pahayag ni Chinese Ambassador Jing Quan na madaling manggana an Beijing kun gagamit ini nin puwersa kontra sa Pilipinas.
Segun ki De Lima, bakong angay an pahayag kan China sa mga aksyon kaini sa West Philippine Sea (WPS), kaiba an sinasabing pag-harass sa mga Pilipinong parasira. Idinugang niya na padagos na ipagdedepensa kan nasyon an soberanya asin mga karapatan kaini.
Kaugnay kaini, kinondenar man kan House Young Guns bloc an pahayag kan ambassador, na segun sa sainda, sarong pagbabanta imbes na diplomasya. Idinugang ni Deputy Speaker Paolo Ortega V na bakong garantiya nin katuninungan an pagbabanta kan mas makapangyarihan na nasyon sa mas sadit na estado.
Naghagad man sinda Deputy Speakers Jay Khonghun asin an iba pang miyembro kan bloc na igalang kan China an international law, an United Nations Convention on the Law of the Sea (UNCLOS) asin an 2016 arbitral ruling. Hinagad man ninda sa Beijing na ihinto an pag-harass sa mga parasira asin personahe kan Philippine Coast Guard.
Idinugang kan grupo na dapat masukol an katuninungan sa paggalang sa karapatan kan Pilipinas, kaligtasan kan mga parasira asin katalingkasan na gamiton kan nasyon an mga karapatan kaini sa exclusive economic zone.
