Nagpaplano na magkaigwa an Department of Agriculture (DA) nin quantitative restrictions sa pag-angkat nin karneng orig sa Nobyembre, huli sa peligro sa lokal na industriya nin pagbababuyan.
Segun ki Agriculture Secretary Francisco Tiu Laurel Jr., pwedeng ipundo an pagtao nin sanitary and phytosanitary import clearance (SPSIC) para sa nagkapirang pork cuts sa laog nin 30 sagkod 60 aldaw.
Katuyuhan kaini na protektahan an lokal na industriya nin pagbababuyan na nag-aagi nin pagbaba kan presyo sa farmgate asin pagkawara nin kita huli sa pagdakol kan inangkat na karneng orig.
An ano man na desisyon manungod sa import restrictions ipapaidalom sa legal na pagrepaso asin kaipuhan an pag-aprobar kan iba pang ahensya kan gobyerno.
Pigrerepaso man kan Tariff Commission (TC) an petisyon kan DA na magpataas nin taripa sa inangkat na karneng orig.
Sa ibong kaini, padagos an DA sa pag-ako nin minimum access volume (MAV) applications para sa 2027, huli ta ini sarong kasunduan sa pagultanan kan mga nasyon.
