Nakatalaan na magkaigwa nin Voter Education Campaign an Commission on Elections (COMELEC) Naga City sa manlainlain na barangay sa bilog na ciudad tanganing edukaron an mga botante manungod sa importansya kan “Yes” o “No” na boto para sa maabot na aldaw kan Plebisito sa Nobyembre 21, 2026.
Ini kasunod kan deklarasyon ni Presidente Bongbong Marcos Jr. sa Naga bilang sarong “Highly Urbanized City” sa paagi kan Resolution No. 2026-078 kan Mayo 26, 2026.
Sa intrevesta kan Bombo Radyo Naga ki Atty. Maico T. Julia Jr., Election Officer kan COMELEC Naga City, saiyang sinabi na an kita kan Naga City nagkakantidad nin 50 million, at may total na populasyon na labi sa 200,000, na nakakakua kan mga estandarteng rekisitos para sa sarong siyudad na maklasipikar bilang “Highly Urbanized.”
An Plebisito sarong direktang boto kan mga botante manungod sa sarong importanteng isyu pampubliko.
Para makonsiderar an sarong siyudad na “Highly Urbanized City,” kaipuhan na ratipikaron kan mga botante sa paagi kan sarong plebisito kun sinda pabor o dai pabor sa pagkakombertir.
Sa presente, an COMELEC padagos pang minapinal kan iskedyul kaini para sa voter education campaign sa kada barangay.
Ini posibleng makapag-edukar sa mga botante kun ano an plebisito, paano magboto, asin an importansya kan kada “yes” o “no” na boto.
An panahon kan kampanya nagpoon kan Oktubre 19, asin matatapos sa Nobyembre 19.
Idinugang man ni Atty. Julia na kun an siyudad makombertir sa sarong Highly Urbanized City (HUC), mas dakol na investment, progreso, asin urbanisasyon an posibleng maasahan sa Naga City.
Minsan siring, gusto niyang maaraman kan publiko an mga advantages asin disadvantages kan ratipikasyon bago maghulog kan saindang boto.
An aldaw kan plebisito gigibuhon sa Sabado kan Nobyembre 21.
An oras kan pagboto iyo an 5:00 AM sagkod 7:00 AM para sa mga Senior Citizen asin Persons with Disability, asin 7:00 AM sagkod 3:00 PM para sa mga regular na botante.
