Preparado na an COMELEC-Naga sa BSKE 2026 Maski May Posibilidad na Mapostpone.
Sa intrevista kan Bombo Radyo Naga ki Atty. Maico Julia – Election Officer, Comelec-Naga, sinaysay kaini na maagi pa sa proseso an pag-apruba kan nasabing Bill, asin kun mapirmahan ini ni President Ferdinand Marcos Jr., mapopostpone an eleksyon. Alagad, kun mayu pang ley, preparado man giraray an Commission on Elections (COMELEC) na magsagibo nin eleksyon sa maabot na Nobyembre.
Segun ki Julia , nasa 50 porsyento an tsansa na madagos an eleksyon asin 50 porsyento man an posibilidad na mapostpone ini, depende sa magigin desisyon asin pag-apruba sa nasabing Bill.
Dagdag pa kaini, dapat bago mag-file nin Certificate of Candidacy (COC) sa Septyembre 28 ay may pinal nang desisyon an Kongreso kun madadagos o mapopostpone an eleksyon.
Dakula man an magigin epekto kaini sa plebisito, partikular sa budget, huli segun sa estimate kan COMELEC, nasa P22 milyon an magagastos kun isasabay ini sa elections. Alagad, kun dae isasabay an plebisito, posibleng umabot sa P50 milyon an kakaipuhaong pondo.
Mientrastanto, pigpapreparar man giraray kaini an mga botante asin mga kandidato sa posibilidad na madagos an elections, huli dae pa malinaw kun matutuloy o mapopostpone an elections. Tg enkaminar man an publiko na mag-antabay sa mga opisyal na balita asin impormasyon tanganing pirming updated sa magigin pinal na desisyon asin iskedyul para sa BSKE 2026.
