Ikinakabahala kan iba-ibang sektor kan agrikultura an amay na perwisyo kan El Niño sa nasyon, kun sain uminabot na sa poco mas o menos 6.87 bilyong piso an danyos sa pagsisimula pa sana kan grabeng tag-tuyo.
Sa presente, tinatantya na nasa 223,000 na mga paraoma asin sobra 240,000 ektarya kan daga sa omahan an direktang naapektuhan.
An sektor kan mais an pinakagrabeng naapektuhan na may naitalang 4.9 bilyong pisong danyos, mantang nasa 1.5 bilyon man an nawara sa sektor kan paroy.
Segun ki Argel Cabatbat, MAGSASAKA Party-list Representative, an krisis na ini madara nin peligroso na domino effect sa bilog na ekonomiya.
Kun dagos na bumagsak an kabuhayan kan mga paraoma, maapektuhan man an suplay asin presyo kan mga karne nin orig, manok, baka, asin kanding huli sa kawaran nin kakanon asin tubig para sa mga livestock.
Huli kaini, pangamba ninda na mawawaran man nin kita an mga saradit na negosyante asin nagtitinda sa merkado huli ta mayo nang pambakal an mga parabakal, na posibleng magresulta pa sa mas dakulang krisis pinansyal o recession.
Komo solusyon, iginigiit kaini an pangangaipong maprotektahan an mga omahan, magtao nin supisyenteng suplay nin tubig, asin tulos na ilipat an pokus sa pagtanom nin mga drought-resistant crops.
Padagos an pakikipag-ugnayan kan saindang lado sa mga miyembro kaini tanganing hagadon sinda na magbalyo sa mga alternatibong pananom arog kan ube asin cassava.
Segun saiya, an mga ini bakong masyadong maselan sa tubig asin mas hababa an pangangaipo sa mahal na abono o pataba.
Pangapudan kaini sa gobyerno na magpatupad nin mga halawig na programa asin marikas na aksyon tanganing dai tuluyang magadan an produksyon nin kakanon asin maagapan an inaasahang grabeng epekto kaini sa bilog na nasyon.
